ଶୀତୁଆ ସକାଳ

ଶୀତୁଆ ସକାଳେ କଟିକିଆ ବୋହୂ
କମ୍ବଳକୁ ଟାଣି କହେ
ଆଠଟା ବାଜିଲେ ଉଠେଇବ ମୋତେ
ମୁଁ ଆଉ ଟିକେ ଶୁଏ।
ରାତି ପାହାନ୍ତିରୁ ଜେଜେମା ଉଠି
ସକାଳ ସ୍ନାହାନ ସାରି
ଚଉରା ମୂଳରେ ଧୂପ ଦୀପ ଦେଇ
ବସେ ଭାଗବତ ଧରି ।
ଜେଜେବାପା ଏଣେ ଧୂନୀ ଜାଳୁଥାନ୍ତି
ଏକେଣିଆ ଦାଣ୍ଡ ଘରେ
ସକାଳୁ ସନିଆ ଧାନ କାଟୁଥାଏ
ହାଡଭଙ୍ଗା ଶୀତ ଟାରେ ।
ରାତି ନ ପାହୁଣୁ ଝଡ ଦେଖାଦିଏ
ବଡ ବାପା କପ୍ ପରେ
ଶୀତ ସକାଳରେ ଡରି ମରି ବୋଉ
ଚା କରେ ରୋଷ ଘରେ।
ଦାଣ୍ଡ ବାରଣ୍ଡାରେ ବଳିଆ କୁକୁର
ଜାକି ମାଡି ଶୋଇଥାଏ
କାଲୁଆ ପବନ ଦେହରେ ବାଜିଲେ
କୁଙ୍କୁଟି କାଙ୍କୁଟି ହୁଏ ।
ଘରକୂଅପାଣି ବାମ୍ଫ ଉଠୁଥାଏ
ବୋଉ ଦେଇଥାଏ କାଢି
ସକାଳ ଗାଧୁଆ ପୂର୍ବରୁ ମୋ ବାପା
ନିତି କାଟନ୍ତି ଦାଢି ।
ନାନା ଜାତି ଫୁଲ ପନି ପରିବାରେ
ବାଡି ଘର ଉଠେ ପୁରି
ଶୀତୁଆ ସକାଳ ମନେପଡେ ନାହିଁ
ପୁଷ ମାଘ ଗଲେ ସରି ।