ଧୀର ସମୀରଣ ବହୁଅଛି ଆଜି
ଆସିଛି ଶରତ ନବବଧୂ ସାଜି,
ନବବେଶେ ଏଇ ଶ୍ୟାମଳ ମେଦିନୀ
ମନ ମୋହି ସତେ କରୁଛି କି ଗୁଣି ।
ତଟିନୀ ତଟେ ଏ କାଶତଣ୍ଡୀ ଫୁଲ
ଆଶ୍ୱିନ ଶେଷ ଯାଏଁ ଅଛି ତା’ ମୂଲ,
ଲୋଟେ ଯେ ଶେଫାଳୀ ତଳେ ମାଳ ମାଳ
କିଏ ବା ହୋଇବ ତା’ର ସାଥେ ତୁଲ !
ଆବାହନ କରୁଅଛି ଧବଳ ଧରଣୀ
ଅବତରି ଆସିଛି ସିଂହବାହିନୀ,
ଧରା ପାଇ ତା’ର କୋମଳ ପରଶ
ମନ୍ତ୍ରିତ ହୋଇଛି ମାଟି ଓ ଆକାଶ ।
ସଭିଙ୍କଠୁ ଶ୍ରେୟ ସେ ମାଁ ଭଗବତୀ
ନେତ୍ରେ ଦିଶେ ଚାରୁ ବିଭ୍ରାଜ ମୂରତୀ,
ଅଞ୍ଜନ ରଞ୍ଜିତ ତୁମ ସେ ନୟନ
ଯେତେ ଦେଖିଲେ ବି ନ ପୁରେ ଏ ମନ !
ଭାଲପଟ୍ଟ ହୋଇଥାଏ ସିନ୍ଦୂରିତ
ଦେବନର ସବୁ ତୋହର ଆଶ୍ରିତ,
ପୁଷ୍ପ ପ୍ରଭ୍ରଷ୍ଟକ କଣ୍ଠେ ଯେ ବୀକ୍ଷିିତ
ଅଲକ୍ତକ ଗାର ପୟରେ ଶୋଭିତ ।
ବେନିପାଶେ ଅସ୍ତ୍ରଶସ୍ତ୍ର ରହିଅଛି
ଶିରେ କିରୀଟ ଯେ ଶୋଭା ପାଉଅଛି,
ରମଣୀୟ ଦିଶୁଛି ତୋର କୁଣ୍ଡଳ
ଧରିଅଛୁ ମାଆ ତୁ ହସ୍ତେ ତ୍ରିଶୂଳ ।
ମୁଗ୍ଧ କରୁଛି ତୋର ଗାଢ଼ କୁନ୍ତଳ
ଶୁଭୁଅଛି ପାର୍ବଣର କୋଳାହଳ,
ଝୁଣା, ଦୀପ, ଧୂପ ଚଉଦିଗ ବାସେ
ମାଁ ଆସିଛି ବୋଲି ମହି ଆଜି ହସେ ।
ନାଲି ପାଟ ବସ୍ତ୍ରେ ଦିଶୁ ତୁ ସୁନ୍ଦର
ପୂଜନ୍ତି ତତେ ଯେ ସବୁ ନାରୀ ନର,
ମହିଷା ମର୍ଦ୍ଧିନୀ ହେ ପାପ ନାସିନୀ
ମଙ୍ଗଳ କରୁଥା ଆହେ ତ୍ରିଲୋଚନୀ ।
ଯୁଗେ ଯୁଗେ କରୁଥା ତୁ ପାପ ନାଶ
ବାଣ୍ଟୁଥା ତୁ ମମତାର ସ୍ନେହରସ,
ରହିଥାଉ ମୁହଁ ସଦା ହସ ହସ
ଶିରସି ସଭିଙ୍କୁ ମାଁ ଦେ ଶୁଭାଶିଷ ।
